Nau mai ki Te Wiki o te reo Māori - Welcome to Māori Language Week

Ko te hiahia a Te Minita Whanaketanga Māori a Nanaia Mahuta kia rauhī katoa mai a Aotearoa ki runga i te kaupapa o Te Wiki o te Reo Māori e tīmata ana i te rangi nei. 

Ka tū Te Wiki o te Reo Māori mai i te 10 ki te 16 o Mahuru 2018. Ko tōna kaupapa ko ‘Kia Kaha te Reo Māori’, he karanga kia whakapakari i tō tātou reo. 

Kāore pea he āhuatanga i tua atu i te reo Māori e kīia nei ‘He tangata nō Aotearoa tātou’. E taea ai e te katoa te whakanui, te whakarauora anō hoki i tō tātou reo,” te kī a Nanaia Mahuta. 

“He nui ngā huarahi mā te tangata ki te whakaatu i tōna tautoko mō te reo. Ka taea e ngā pāpā, e ngā whaea, e ngā kaumātua hoki te whakaatu te ngākaunui otirā te tautoko mō ā rātou tamariki i a rātou e ako ana i te reo Māori i te kura. Mēnā kāore he akoranga reo Māori i te kura, e āhei ana ngā mātua ki te tono i a rātou kia tīmata.  

“Ka taea e te ao pakihi e ngā rōpū hapori hoki te whakaatu pānui reorua hei tohu he wāhi tōna e manaaki ana i te reo Māori ahakoa tūmatanui, tūmataiti rānei. 

“I a tātou katoa e mahi ana i ngā mahi o ia rā e taea hoki ai te tuku te paku ‘kia ora’, te paku ‘mā te wā' rānei. Ia wā ka tika tō whakamahi, tō whakahua rānei i te reo Māori he iti pounamu tērā ki te whakarauoratanga o te reo Māori hei reo o ia rā, o ia rā. Ahakoa iti, he pounamu”.  

Kua puta te karanga kia huihuia ai te tangata ki ngā hīkoi whakanui i te reo Māori e tū ana ki ngā takiwā e ono neke atu pea – Tūranga, Manukau, Te Puku o Tāmakimakaurau, Te Whanganui-ā-Tara, Rotorua hoki. 

Ehara i te mea mō te mimiti o te reo anake te kōrero mō te reo Māori. He kōrero manahau, he kōrero kohara anō hoki.  He tohu ahurea e kaha whakanuia ana e tātou, he iti rearea, e whaiwhai ana i te whawhai pai kia piki tonu, kia kake tonu i te kahikatea ahakoa tōna nui, tōna teitei.” 

E mihia ana ngā tāngata katoa e mahi ana i ngā mahi whakatairanga i te reo mō Te Wiki o te Reo Māori. E mea ana ia, ehara i te mea he tūreiti rawa kia tautoko mai i tēnei wāhanga matua i te tuakiri o Aotearoa. 

“Me tīmata i te rangi nei. Tautokona, waiatatia, kōrerohia. Ahakoa tāu e whiriwhiri ai, he mea tautoko i te āpōpō, otirā te anamata o te reo me te āhua o tō tātou whenua. Kia kaha te reo Māori,” te kī a Nanaia Mahuta.

Taipitopito pāpāho 

Te Wiki o te Reo Māori

Ngā Hīkoi Whakanui i te Reo Māori o Te Wiki o te Reo Māori

Maihi Karauna – Te Rautaki Reo Māori o te Karauna

  • Mō te Maihi Karauna me ngā kōrero ki te whakatakoranga o ngā whakaaro, haere ki tpk.nz/maihikarauna.